बैशाख १६-लोकतान्त्रिक समाजवादी पार्टी नेपालले विभिन्न २० वटा प्रतिबद्धतासहितको स्थानीय तह निर्वाचन–२०७९ घोषणापत्र सार्वजनिक गरेको छ ।
शुक्रबार काठमाडौँमा कार्यक्रम गरी लोसपाका अध्यक्ष महन्थ ठाकुर, वरिष्ठ नेता राजेन्द्र महतोलगायतले चुनावी घोषणापत्र सार्वजनिक गरेका हुन् । लोसपाले सबल, सक्षम र स्रोत सम्पन्न स्थानीय सरकार, सहज, छरितो र प्रभावकारी सेवा प्रवाह, सर्वसुलभ र गुणस्तरीय स्वास्थ्य सेवा, निःशुल्क र व्यावहारिक सबै तहको शिक्षा, महिलामैत्री पूर्वाधार एवम् विशेष सुविधाको व्यवस्था गर्ने प्रतिबद्धता जनाएको छ ।
त्यस्तै कृषिसेवा विस्तार, सिँचाइ एवम् प्रभावकारी बजार व्यवस्थापन, चुरे जोगाऔं, मधेश बचाऔंलगायत प्रतिबद्धता घोषणापत्रमा उल्लेख छ ।
लोसपाले पहिचानमा आधारित राज्य पुनर्संरचना एवं संविधानमा भएका कमजोरी सच्चाउनका लािग फेरि संघर्ष गर्नुपर्ने अवस्था उत्पन्न भएको र यसका लागि तयार रहेको जनाएको छ ।
कार्यक्रममा लोसपा अध्यक्ष ठाकुरले मुलुक संघीय राज्य भएपछि सबै क्षेत्रमा समान अधिकार दिने भनिएपनि त्यसो हुन नसकेकाले आफ्नो पार्टीले यसलाई प्रमुखताका साथ उठाएको बताए ।
नेपाल भारत सीमा क्षेत्रमा देखिएका समस्या समाधानका लागि पनि जसपाले विशेष ध्यान दिने उनको भनाइ छ । उनले मधेश क्षेत्रका खानेपानी, स्वास्थ्य र शिक्षाको क्षेत्रमा विशेष जोड दिनुपर्ने पनि बताए ।
त्यस्तै लोसपा वरिष्ठ नेता राजेन्द्र महतोले कांग्रेस, कम्युनिष्टहरू सत्ता र सरकारका लागि चुनाव लड्ने भएपनि लोसपा अधिकार र पहिचानका लागि चुनाव लड्ने बताए ।
चुनावलाई नै आन्दोलनको रूपमा लिँदै अधिकार प्राप्तिको आगामी संघर्षका लागि लोसपा तयार रहेको उनको भनाइ छ । त्यस्तै उनले निर्वाचनकै खिल्ली उठाउने गरी ठूला दलहरू गठबन्धन बनाएर चुनाव लड्न लागेको भन्दै लोसपा एक्लै चुनाव लड्ने बताए । लोसपाले कांग्रेस ठूलो पार्टी भएपनि काम सानो र कम्युनिष्ट पार्टीहरू विचारशून्य सत्तालोलुप राजनीतिक उद्यमी भएको टिप्पणी पनि गरेको छ ।
Leave a Reply