विद्युत प्राधिकरणको निमित्त कार्यकारी निर्देशकमा शाक्य

 ग्लोवल टि.भी.      सोमवार, कार्तिक २४, २०७७      0

काठमाडौं । सरकारले नेपाल विद्युत प्राधिकरणको निमित्त कार्यकारी निर्देशकमा हितेन्द्रदेव शाक्यलाई नियुक्त गरेको छ । ऊर्जा मन्त्रालयले शाक्यलाई सोमबार निमित्त कार्यकारी निर्देशकमा नियुक्त गरेको हो । शाक्यलाई एनईए इन्जिनियरिङ कम्पनीमा काज फिर्ता गराएर प्राधिकरणको निमित्त कार्यकारी निर्देशको जिम्मेवारी दिइएको हो ।

ऊर्जामन्त्री वर्षमान पुनले शुक्रबार बसेको प्राधिकरण सञ्चालक समितिको बैठकमा शाक्यलाई काज फिर्ता गराउन निर्देशन दिएका थिए । यसअघि प्राधिकरणमा तहगत जिम्मेवारीका विषयमा असन्तुष्ट रहेका शाक्य आफुभन्दा कनिष्ठ लेखनाथ कोइरालालाई निमित्त कार्यकारीको जिम्मेवारी दिएपछि कार्यालयमा उपस्थित भएका थिएनन् ।

बरिष्ठताका आधारमा शाक्य लेखनाथ कोइरालामाथि माथिल्लो तहमा पर्छन् । यो विषयमा प्रधानमन्त्री केपी शर्माओलीले बरिष्ठलाई पन्छाएर कनिष्ठलाई निमित्त कार्यकारी निर्देशक बनाइएको भन्दै ऊर्जामन्त्री पुनसँग असन्तुष्टि पोखेका थिए । कुलमान घिसिङलाई पुनरनियुक्ति गर्न समेत असहमत भएका प्रधानमन्त्री ओलीले बरिष्ठताका आधारमा शाक्यलाई निमित्त कार्यकारी निर्देशक बनाउनुपर्ने बताउँदै आएका थिए । कोइरालाले पनि शाक्यलाई आइतबार प्राधिकरणको केन्द्रीय कार्यालयमा हाजिर हुन शाक्यलाई निर्देशन दिएका थिए ।

प्राधिकरणको सहायक कम्पनीका रुपमा रहेको एनईए इन्जिनियरिङ कम्पनीको नेतृत्वमा रहेका उनी प्रसारण लाइनको विषयमा राम्रो जानकार मानिन्छन् । यसअधिका कार्यकारी निर्देशक कुलमान घिसिङले नै उनलाई एनईएको जिम्मेवारी पठाएका थिए । एनईए इन्जिनियरिङ सेवामा विदेशिने रकम जोगाउन भन्दै २०७३ सालमा स्थापना गरिएको प्राधिकरणको सहायक कम्पनी हो । शाक्य त्यसको प्रवन्ध निर्देशक रहेका थिए ।

छुटाउनु भयो कि?

फेसबुक छैन तलको फारम भर्नुहोस् ।

Leave a Reply

Your email address will not be published. Required fields are marked *