शंकर मोक्तान । बालयौनदुराचारको अभियोगमा मंगलबार पोखराबाट अमेरिकन नागरिक माइकल नोरम्यान टेलोर पक्राउ परे । प्रहरीको केन्द्रिय अनुसन्धान व्युरो (सिआईबी)ले पोखरा महानगरपालिका–१८ सेदीबाट माइकल नोरम्यान टेलोरलाई पक्राउ गरेको हो । पछिल्ला केही वर्ष यता नेपाल घुम्न आउने बहानामा विदेशी नागरिकले बालिकामाथि यौनदुराचार गरेको घटना बढेको छ । मंगलबार पक्राउ परेका अमेरिकन नागरिक माईकल नोरम्यानको नेपाल आउजाउ बाक्लै थियो । प्रहरीका अनुसार उनी सन् २०१८, २०१९ र २०२१ गरी तीन पटक नेपाल आएको देखिएको छ । अमेरिकामा रहँदै उनी नेपालमा रहेका बालबालिका संग सामाजिक सन्जाल मार्फत नजिक हुने गरेको प्रहरीको भनाई छ ।

हालै मार्च २१ मा नेपाल आएका माईकल नोरम्यान पनि यौनदुराचारको मनसाय राखेर पोखरा गएको देखिएको प्रहरीले जनाएको छ । प्रहरीको केन्द्रिय अनुसन्धान व्युरो सिआईबीका प्रवक्ता गंगा पन्तका अनुसार पक्राउ परेका माईकल नोरम्यान हाईप्रोफाईल व्यक्ति हुन् । क्यालिफोर्निया निवासी उनी अधिवक्ता भएको खुलेको छ । पटक–पटक नेपाल आउने क्रममा २०१९ मा ३ जना बालबालिकाहरुमाथि यौनदुराचार गरेको आरोप लागेको छ । प्रवक्ता पन्तका अनुसार सामाजिक सन्जाल मार्फत विभिन्न प्रलोभन देखाएर बालबालिकालाई नजिक बनाउने गर्थे । पछिल्लो केहि वर्षलाई हेर्दा कोही समाज सेवाको बहानामा त कोही गरीब, अशिक्षित र सडक बालबालिकामाथि यौनदुराचार भइरहेको प्रहरीको बुझाई छ ।

हाई प्रोफाईल यौनदुराचारी

२०७४ चैतमा काभ्रेको मण्डन देउपुर १ बाट क्यानडाका पिटर जोन डलग्लिस पक्राउ परे । उनको पृष्ठभूमी हेर्दा बालयौन दुराचारी होलान् भनेर कसैले सोच्नै सक्दैनन् । राष्ट्रसंघका जागिरे, युएन ह्याबिट्याटको अफगानिस्तान प्रमुख, विश्व स्वास्थ्य संगठनमा सिनियर अर्बान एडभाईजर, ३ वटा मानार्थ विद्यावारिधी पाएका व्यक्ति । नेपालमा हिमालयन कम्युनिटी फाउन्डेशन सन्चालन गर्थे । मंगलबार पक्राउ परेका अमेरिकन नागरिक माईकल नोरम्यान पनि अधिवक्ता हुन् । उनी अमेरिकामा वकालत गर्छन् । हाईप्रोफाईल व्यक्तिहरुको अपराधलाई हेर्दा विश्वास गरिहाल्न नसकिने र विदेशी भन्दैमा विश्वास नगर्न सिआइवीले सबैसंग आग्रह गरेको छ ।

निशानामा नेपाली बालबालिका, प्रलोभनमा पार्छन

यौन दुराचारीले समाज सेवाको आवरणमा गरीब तथा विपन्न समुदायलाई शिक्षा र खानेपानीको झुट्टो आश्वासन दिन्छन् । बालबालिकालाई पढाइदिने, जागिर लगाइदिने लोभ देखाउँछन् । यौन दुराचारीको नजर गरीब मुलुकमा देखिएका छन्

। ‘ग्लोबल स्टडी अन सेक्सुअल एक्सप्लोइटेसन अफ चिल्ड्रेन इन ट्राभल एण्ड टुरिजम’ नामक अध्ययन प्रतिवेदन अनुसार विश्वका जुनसुकै देशका यौनदुराचारीको निशानामा नेपालका बालबालिका रहेको देखिन्छ । उक्त प्रतिवेदनले अन्य एसियाली मुलुकका बालबालिकासमेत असुरक्षित रहेको उल्लेख गरेको छ । नेपाल, कम्बोडिया, हाइटी, होण्डुरस, केन्यासहितका मुलुकमा बालबालिका यौनदुराचारीको निशानामा रहेको प्रतिवेदनमा उल्लेख छ ।

प्रहरीका अनुसार विदेशी बाल यौन दुराचारीको कब्जाबाट उद्धार गरिएका सामान्य परिवारका बालबालिका रहने गरेका छन् । दुर्गम गाउँका, सडक बालबालिका र होटलका काम गरिरहेका बालबालिकाहरु दुराचारीहरुको नजरमा पर्छन् । अधिकांश बालबालिकालाई दुराचारीले प्रलोभन देखाएर फसाउने गरेको देखिएको छ । दुईवर्ष यता दर्जनौ यौनदुराचारी पक्राउ परेका छन् । यस्ता अपराधमा बढी युरोपेली र अमेरिकी नागरिक संलग्न रहेको पाइएको छ । जर्मनी, अस्ट्रिया, नेदरल्याण्ड्स, क्यानडा र फ्रान्स लगायतका विदेशी नागरिक पनि बालयौनदुराचारमा लागेको पाइएको छ ।

कानुनी कारबाही

मुलुकी अपराध (संहिता) ऐन २०७४ को दफा २२५ अनुसार, कसैले करणीको आसयले बालबालिकालाई अस्वाभाविक रूपमा एकान्तमा लगेमा, यौनाङग छोएमा वा छुन लगाएमा बाल यौन दुराचार गरेको मानिन्छ । बाल यौन दुराचारको घटनामा दोषी ठहर भए तीन वर्षसम्म कैद र ३० हजार रूपैयाँसम्म जरिवाना हुने दफा २२६(२) मा उल्लेख छ । पक्राउ परेकाहरू सजिलै छुट्ने र सरकारले बाल यौन दूराचारलाई गम्भीर प्रकृतिको अपराधका रूपमा नलिने प्रवृत्तिले पनि नियन्त्रणमा समस्या निम्त्याएको हो ।